14.6.17

Բաց նամակ Կրթութեան եւ Գիտութեան նախարար Լեւոն Մկրտչեանին

Յարգելի պարոն նախարար,
Երեւան քաղաքը հեղեղուած է ԲՈՒՀ-ական գրաւորների վաճառքով զբաղուող referat.am եւ նմանօրինակ այլ կայքերի գովազդային վահանակներով եւ յայտարարութիւններով:
Մեր այն հարցմանը, թէ ՀՀ Կրթութեան եւ Գիտութեան նախարարութիւնը ունի՞ որեւէ դիրքորոշում այդ գովազդների վերաբերեալ, նախարարութեան թէժ գիծը տուել է բացասական պատասխան՝ նկատի ունենալով, որ գովազդը չի խախտում ՀՀ օրէնքը:
Այսինքն, ստացւում է, որ քաղաքում բացէ ի բաց գովազդւում են գրագողութիւն սատարող եւ դրա արդիւնքները վաճառքի հանող կայքեր, իսկ ՀՀ Կրթութեան եւ Գիտութեան նախարարութիւնը ոչինչ չի անում՝ դրանց գործունէութեան, առաւել եւս՝ գովազդի դէմ միջոցներ ձեռնարկելու վերաբերեալ:
Միանշանակ է, որ գրագողութիւնը, ինչպէս նաեւ ակադեմիական անազնուութեան այլ ձեւերը, կործանարար են թէ՛ կրթական եւ թէ՛ գիտական ոլորտի համար: Վաճառքի հանուած գրաւոր աշխատանքների գնորդները բարեյաջող աւարտում են ԲՈՒՀ-երը, գիտական աստիճաններ եւ կոչումներ ստանում՝ ի չիք դարձնելով բարեխիղճ դասախօսների աշխատանքը: Արդիւնքում վարկաբեկւում է մեր երկրի կրթական համակարգն ընդհանրապէս: Եթէ հնարաւոր է գովազդել եւ իրականացնել ակադեմիական աշխատանքների առուծախը, ապա կրթական ասպարէզում ազնուութիւն ապահովելուն ուղղուած մեր ջանքերը աչքակապութիւն են:
Սոյնով դիմում ենք Ձեզ՝ ակադեմիական անազնուութիւն տարածող կազմակերպութիւնների գործունէութեանը ուշադրութիւն դարձնելու, եւ դրանց գովազդի դէմ պայքարի մէջ մեր կողքին կանգնելու խնդրանքով:
Յարգանքով՝
ՀՀ տարբեր ԲՈՒՀ-երի դասախօսներ
Արթուր Աւանեսով,
Վահրամ Դանիէլեան,
Սիրանոյշ Դվոյեան,
Յովհաննէս Յովհաննիսեան,
Սմբատ Յովհաննիսեան,
Արմէն Մկրտչեան,
Նարեկ Մկրտչեան,
Սոնա Մնացականեան

«Հետք», 12 Յունիս 2017 (http://hetq.am/arm/news/79682/bac-namak-krtutyan-ev-gitutyan-nakharar-levon-mkrtchyanin.html)


No comments:

Post a Comment